منرفعلك يا ربّ السما والأرض قلوبنا وأفكارنا وعقولنا فعل تسبيح وتمجيد وشكر على هالصباح المبارك واللي فيه عم تشرق نورك علينا.
يا ربّي يسوع، إنت اللي دعيتنا وبتبقى داعينا دايماً لوليمتك تا نعرف معنى الحبّ المجّاني، الحبّ اللي ما فيه مصلحة، ونحنا بدورنا رح نحاول نكون مستحقّين هالدعوة رغم كل التحدّيات اللي بتواجهنا.
يا ربّي يسوع، إنت اللي دعيتنا وداعينا تا نحبّ متلك، ومش تا نحب بس اللي بيعطينا بالمقابل، لا بل تا نحب ونعطي الفقراء اللي مش قادرين يردّولنا، ونحنا رح نسعى إننا نعطي من قلبنا وما نبخل بعطاءاتنا.
سعادتنا يا ربّي يسوع لمّن منشوف المحتاجين للمسة حب وحنان عم بيلاقوها بحضورنا حدّن، ورغبتنا إننا نكون مكرّمين بنظرك، ومش بنظر الناس، وهدفنا إننا نحصل، مقابل اللي عم نعطيه، على نعمة القداسة اللي منمجّدك فيا يا إلهنا الحبيب.
/الخوري يوسف بركات/
