يا إله السما والأرض وكل اللي فيها، الصباح بيحلى بنورك، والنهار بيكمل بحضور ربنا يسوع المسيح، واليوم بيكتمل بحضور روحك القدّوس.

عظيم إنت يا ربّي يسوع وكلامك كلّو حياة، إنت النبع الحقيقي اللي بيروي العطشان لميّ الحياة اللي ما بتخلص ولا بتنقطع.

عظيم إنت يا ربّي يسوع، وكلامك ما بيزول، إنت اللي بكلمة منّك بتغيّر كل إنسان قرّر إنّو يلتجي لإلك، وبكلمة منّك بتعطيه الخلاص بمجرّد ما قرّر إنّو يكون مرسل لإلك ويعطي صورة حلوة عنّك.

عظيم إنت يا ربّي يسوع، وكلامك حقّ وحقيقة، إنت اللي علّمتنا إنّو نقول الحقيقة بكل الظروف وما نلجأ للخطيّة لأنها بتولّد الموت الأبديّ ونحنا أبناء الملكوت، دورنا نعرف كيف نولد من جديد، بقوّة الروح القدس، ونكون شفّافين بكل لحظات حياتنا.

/الخوري يوسف بركات/