بكل صباح يوم جديد بتطلّ علينا شمسك يا رب، وحاملتلنا نورك اللي بيملّي قلوبنا فرح وسلام.
يا إلهنا الحبيب، إنت اللي عطيتنا مثلين من عالم الطبيعة، مثل الزهور بجمالا والله اللي خلقا ما بيتركا، والطيور على أنواعا بطعاما وشرابا ما بتعتل همّ لأنّو الله اللي خلقا حاضر دايماً تا يعطيها حاجاتا الحياتيّة.
يا إلهنا الحنون، كتار اللي بيركضو ورا معلّمينن كرمال مصلحة أو مركز أو سلطة معيّنة، وكلّ همّن صار كيف يرضوهن، بينما إنت الوحيد يا ربّ اللي بتقلّنا تا ما نهتمّ بشي بهالحياة إلّا بخلاص نفوسنا.
يا يسوعنا الحبيب، نحنا، كأبناءك وبناتك اللي إخترنا إننا نمشي بطريق التلمذة لإلك، بدنا ياك وحدك معلّمنا، ما بدنا نعيش بالهمّ، لا بل بدنا ننطلق تا نشتغل بكرمك، ونستثمر بالوزنات اللي عطيتنا ياها بهالحياة، وكلنا ثقة إنّو الثمر رح بيكون الملكوت السماويّ المُعَدّ لإلنا.
/الخوري يوسف بركات/
