منرفعلك يا ربّ أجمل ألحان التسبيح والمجد بهالصباح المبارك، ومنشكرك على نورك اللي بتشرقو علينا مع كل طلعة شمس.

مبارك أنت يا ربّ، كيف بتختار رسلك تا يكونو شهود لقيامتك بالعالم، وبتدعيهن تا يروحو يبشّرو فيك بكل مكان بيكونو فيه، وروحك القدّوس مرافقن.

ومن بين كل الناس والرسل، اللي كانو بالعليّة، بين الصعود والعنصرة، إخترت متّيّا تا يكون خلف ليهوذا اللي نكرك، ويكون أمين لهالرسالة اللي وكّلتا لإلو.

يا يسوعنا الغالي، عم نسعى، وبدنا نضل نسعى ونطلب من الروح القدس إنّو يقودنا بالطريق الصحيح صوب الملكوت.

بدنا نوحّد كل أعضاءنا تا تكون عم بتمجدك بكل ظروف الحياة، وتكون أفعالنا وأقوالنا إنعكاس لنور حبّك وحنانك بالعالم.

/الخوري يوسف بركات/