مع بداية هالأسبوع، وبصباح هالنهار المبارك، منرفعلك يا ربّ السما والأرض كل التسبيح والتمجيد.
ما أعظمك يا إلهنا الحبيب، ربّنا ومخلّصنا يسوع المسيح، إنت اللي بتعطي أهميّة لكل واحد وواحدة فينا، وبتخلّينا نوعا على دورنا كمسيحيين عم نعكس صورتك بالعالم.
ما أعظمك يا إلهنا الوحيد، إنت اللي وثقت فينا وقت خلقتنا، وعطيتنا القدرة على إننا نكون سراج يضوّي من نورك للعالم وتبقى حياتنا منارة لكل إنسان بيفكّر فيك أو بيتساءل عنّك.
نعم يا ربّ، نحنا بدنا نكون هالسراج الحقيقي اللي عم يعكس نورك الحقيقي، نور المحبّة والفرح والسلام والتواضع والمسامحة وبذل الذات، حبّا فيك، وما بدنا نخسر بأقوالنا وأعمالنا لقاءنا فيك، لا بل بدنا نكون هالشعاع الحقيقي لنورك اللي ما بينتهي.
/الخوري يوسف بركات/
