24 Jun
24Jun

مع إطلالة هالصباح اللي بتشرق فيه علينا نورك يا ربّ، منرفعلك قلوبنا وأفكارنا وعقولنا فعل شكر وتسبيح.

منشكرك يا ربّ لأنّك بتحبّنا حبّ ما إلو حدود، حتّى إنّك نزلت عن عرش مجدك تا تشابهنا وتكون إنسان متلنا وتعطينا الخلاص.
منشكرك يا إلهنا الحنون، إنت تحنّنت على شعبك وبعتلّو النبي يوحنّا المعمدان، من زكريّا الشيخ وأليصابات العاقر، تا يحضّر الناس لمجيء المخلّص.

منشكرك يا إله الرحمة، إنت اللي من فيض حبّك وحنانك، رحمت الشعب اللي تركك وتعالى عليك وإلتفت لملذّاتو وشهواتو ورغباتو وأنانيتو، ومع هيدا وكلّو ما تركتو وبعتّلنا المخلّص يسوع المسيح.

كيف ما بدنا نحبّك ونعشقك ونعبدك يا إله المحبّة والرحمة والحنان، إنت اللي عطيتنا جسدك ودمك زاد وزوّادة تا نقدر نكمّل برسالة المحبّة اللي دعيتنا إلها؟


/الخوري يوسف بركات/

تعليقات
* لن يتم نشر هذا البريد الإلكتروني على الموقع.