15 Dec
15Dec

مع كل طلعة صباح بيشرق نورك يا ربّ تا تقلنا إنّك حاضر دايماً معنا وما بتتركنا، منسبّحك ومنمجّدك يا إله السما والأرض.

يا ربّي يسوع، يوم عن يوم منكتشف مدى حنانك الكبير اللي ما إلو حدو، ومنلمس رحمتك علينا وقوّة حبّك اللي بتخلّيك دايماً حاضر تا تخلّصنا من كل روح شرّ.

يا ربّي يسوع، يوم عن يوم منكتشف، بإختبارنا معك، إنّو اللي بعد ما آمن فيك، أو حتّى اللي رافضك، خسران كتير بحياتو، والأهمّ إنّو أكيد خسران الفرح والسلام والطمأنينة والراحة واللي ما بينوجدو حقيقة إلّا فيك.

يا ربّي يسوع، يو عن يوم عم نتأكّد إنّك إنت الحق والحقيقة والحياة، وإنّك لا بتغشّ ولا بتنغشّ، وإنّو اللي بعيد عنّك ما رح يقدر يكون متصالح مع ذاتو.

إعطينا يا ربّ نعمة الصدق مع ذاتنا ومعك تا نقدر نعيش السلام والفرح الحقيقي فيك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.