بنهاية هالأسبوع المبارك، منرفعلك يا ربّ السما والأرض كل التسبيح والمجد والإكرام.
كتار الأنبيا اللي شهدولك يا ربّي يسوع، بس أعظم شهادة كانت شهادة يوحنّا المعمدان اللي دل الناس عليك إنّك حمل الله الحامل خطايا العالم، وإنّو هوي منّو شي قدّامك، حتّى ما بيستحق إنّو يفك سيل حذاءك.
صحيح شهادة يوحنّا المعمدان كبيرة، بس الأعظم منها هيّي شهدة الله الآب لإلك يا يسوعنا الغالي، الآب اللي دوّى صوتو عالعالم هوّي وعم بيقول بإنّك إبنو اللي فيه رضي وبيّن للناس ألوهيّتك يا ربّ.
مع شهادة الله الآب ما فينا ننسى يا ربّ شهادة الأعمال اللي كنت تعملا حبًّا بالإنسان، تا تأكّدلو إنّو الله حاضر معو وما بيتركو.
ونحنا يا ربّ، منشهدلك بحياتنا كلّا بإنّك إلهنا وملكنا ومخلّصنا، ورح نسعى إنّو تكون أقوالنا وأفعالنا شاهدة لإلك ولحبّك الغير محدود.
/الخوري يوسف بركات/
