شو بتغمرنا الفرحة يا ربّ لمّن بتشرق علينا نورك عند الصبح، منحسّ بيوم جديد مليان حياة جديدة.
يا ربّي يسوع، مين في أجمل وأهمّ من مريم العدرا، هالصبيّة المتواضعة اللي نقّيتا من قبل ما تتكوّن بأحشاء إمها تا تكون إمّك بالجسد؟
مين في أجمل وأهم من العدرا مريم، تا تحضّرا من قبل ما تخلق وتكون بمشروعك الخلاصيّ للإنسان، ويكون في إلها الدور الأساسي بتجسّدك بيناتنا.
وللحقيقة، ما في أجمل وأهم منّك يا مريم العدرا، إنتي اللي من بعد ما إختارك الربّ، سلّمتيه ذاتك تا تكوني تلميذة ورسولة الربّ للبشريّة.
وبعد الله، إنتي الأجمل بحياتنا يا مريم العدرا، لأنّك قبلتي إنّك تكوني بيت القربان تحملي الله بأحشائك للعالم، وتحملينا بقلبك وبعيونك وتوصّلينا لعند إبنك تا نكون معو بالملكوت السماويّ بس نغادر هالحياة.
/الخوري يوسف بركات/
