خلص أسبوع وبلّش أسبوع جديد، وبيبقى نورك عم يشرق علينا يا ربّ، ورحمتك عم تغمرنا، منشكرك ومنسبّحك ومنمجّدك.
مع زكريا الشيخ منصلّي ومنباركك يا إلهنا الحبيب، لأنّك إفتقدتنا وبعدك عم تفتقدنا بحبّك الإلهيّ ، وعطيتنا الروح القدس تا يعزّينا ويشجّعنا ويقوّينا على كل التجارب والصعاب اللي عم نمرق فيها.
منسبّحك ومنباركك يا إلهنا الحبيب لأنّك خلّصتنا وبعدك عم بتخلّصنا، نحنا أبناءك وبناتك، من الشيطان وتجاربو وحيلو اللي ما بيهدا إلاّ تا يبعّدنا عنّك.
منعظّمك ومنمجّدك يا إلهنا الحبيب، لأنّك عم بتملّينا بحنانك، وتنعم علينا بعطاياك اللي ما بتنعدّ، وبتدعينا إننا نترجما أفعال حبّ بحياتنا.
ومع هالتسبيح والتمجيد رح نسعى يا ربّ إنّو تكون حياتنا بتليق بوصاياك بالقول والعمل.
/الخوري يوسف بركات/
