بهالصباح المبارك، ومع بداية هالأسبوع، منرفعلك يا ربّ كل التسبيح والتمجيد ومنشكرك على هالنهار الجديد.
تعا يا ربّي يسوع، واسكن بقلوبنا وخلّينا نوعى على نعمة الإصغاء اللي زارعا فينا، تا نقدر نسمع ونتأمّل بكلمتك، كلمة الحياة.
أعطينا يا ربّ النعمة والقوّة تا نقدر نعمل متل العدرا مريم، نوقف ونجاهر بإيماننا فيك ونعظّمك بحياتنا، ونتأمّل بحضورك بماضينا وبحاضرنا وبمستقبلنا.
يا ربّي يسوع، اعطينا النعمة والقوّة والثبات تا نكون، متل العدرا مريم، نعرف كيف نحتفل بقداستك بحياتنا ونعيش عا أساس هدف وحيد وهوي إنّك تكون إنت الأوّل بحياتنا.
يا ربّ، رغم كل ضعفنا وهفواتنا، بتضل قلوبنا وعقولنا ونفوسنا بتعظّمك لأنّك عم تصنع كل يوم فينا العجايب.
/الخوري يوسف بركات/
