بصباح هالأحد المبارك، الدني كلّا بتفرح مع أليصابات بزيارتك يا ربّ لعنّا من خلال العدرا مريم.
منشكرك عا محبّتك الكبيرة اللي بتحبّنا ياها.
شو حلوة هالمبادرة اللي عملتيها يا عدرا، انتي اللي بحاجة مين يهتمّ فيكي، رحتي تا تهتمّي بالختيارة وتعطيها فرح الربّ.
شو حلوة هالزيارة اللي عملتيها يا عدرا وخلّيتينا نشوف قدّيش نحنا بعاد عن اللي بحاجة للمسة حنان وحضور الربّ حدّن.
شو حلوة هالزيارة اللي عملتيها يا عدرا، وكانت مليانة محبّة وحنان، وفيها الربّ اللي عم بيحلّ سلامو على أليصابات ويوحنا، وعلينا من خلالن تا يوعّينا على وجودو بيناتنا.
معك يا عدرا مريم رح نحمل هالسلام وهالفرح وهالإيمان لكل الناس القراب والبعاد اللي رح نزورن.
/الخوري يوسف بركات/
