بصباح هالنهار المبارك، وبختام هالأسبوع، منرفعلك يا ربّ قلوبنا فعل حب وإكرام وشكر لإلك على كل عطاياك.

منشكرك يا ربّ ومنباركك لأنّك خلقتنا بزمن تربّينا فيه على حبّك، وتغذّينا من تعاليمك.

منشكرك يا ربّ ومنباركك لأنّنا شفناك وتذوقناك ولمسناك إله وإنسان بتحب وبترحم وبتشفي بكلمة منّك، وما فتنا بالعالم اللي عم يفتّش كيف يعيش وعينو على إله المادّة والأنانيّة.

منشكرك يا ربّ ومنباركك لأنّك سمحتلنا نتعرّف عليك أكتر ونحبّك أكتر ونعشقك أكتر وتملك عا حياتنا كلّا.

منشكرك يا الله الآب ومنباركك لانّك عطيتنا الخلاص، ومنشكرك يا الله الإبن لأنّك أخليت ذاتك تا نتّحد بالآب.

منشكرك يا الله الروح القدس لأنّك دايماً حدنا وبتنجّينا من الشرّير وقوّاتو.

/الخوري يوسف بركات/