طلع الصباح وضوّى نورك علينا يا ربّ، منشكرك ومنسبّحك ومنمجّدك عا كل النِعَم والعطايا اللي بتنعم فيها علينا بهاليوم وبكل يوم.
يا يسوعنا الغالي، كترو بهالإيام اللي عم يدّعيو المعرفة، بس معرفة متحجّرة وعميا، وتحجّرت قلوبن وصارو مليانين حسد وغيرة وتعالي.
يا إلهنا الحبيب، كترو اللي صارو يفتكرو إنّن بيعرفوك بمجرّد ما قريو عنّك، بس مش عارفين إنّن متل هالفرّيسيين اللي افتكروك إنسان عادي إبن النجّار.
يا ربّنا يسوع، ما بدنا نكون متل أهل الناصرة، ندّعي إنّنا منعرف كل شي عنّك ومنرفض عطاياك ومنهينك بكبرياءنا الفاضي والأعمى.
من أعماقنا، نحنا عم نصرخلك يا ربّ، تعا وحرّرنا من آثامنا وخطايانا وضعفنا تا نقدر نتلمّس جمالك فينا.
/الخوري يوسف بركات/
