بهالأحد الفارح، ومع مريم العدرا إمّ الكل، منرفعلك يا ربّ أجمل وأعذب ألحان التسبيح والمجد والإكرام يا إله السما والأرض وكل اللي فيها.
يا بيّنا السماوي، إنت اللي بعتت ملاكك لعند العدرا مريم تا تبشّرا بالحبل الإلهيّ ، تبشّرا وتبشّرنا نحنا البشريّة بالسلام، فإجانا السلام من أحشاءا إبن ومش حيلّا إبن ، يسوع الربّ اللي رح يبني مملكة السلام والحبّ.
يا بيّنا السماوي، إنت اللي إخترت العدرا مريم، بنت الناصرة، تا تكون إمّ لإبنك يسوع اللي رح يحقّق الوعد اللي قطعتو لإبراهيم ولإلنا من خلالو.
يا بيّنا السماوي، منشكرك لأنّك بنيت وبعدك عم تبني أرضنا وتروي قلوبنا من نبع حبّك اللي بيعطي السلام، ورح نسعى دايماً إنّو ما نخون الأمانة اللي سلّمتنا ياها.
/الخوري يوسف بركات/
