منرفعلك، يا إله السما والأرض، كل ألحان التسبيح والتمجيد والإكرام ، ومنشكرك على حبّك الكبير تجاهنا.

يا ربّي يسوع، قدّيش حاول اليهود إنّن يتفلسفو عليك ويحطّوك بقالب عقولن ويحجّموك، لهيك ما قدرو يفهمو مين هوّي الآب اللي بتحكي عنّو.

يا ربّي يسوع، ضعف إيمان التلاميذ ما خلّاهن يعرفوك ولا حتّى يشوفوك، لهيك كانت أعمالن وأقوالن سطحيّة وبعيدة عن الإيمان اللي بيقرّب الإنسان منّك، إنت الإله الحقيقي.

ونحنا يا ربّ، بكتير من الأوقات والمواقف، وقدّام الكتير من الصعوبات، مننسى إنّك الله القادر عا كلّ شي، ومنصير نتّكل عا ذاتنا.

خلينا يا ربّ دايماً نتذكّر هويّتنا كأبناء وبنات الملكوت، شعارنا المحبّة وترجمتا أفعال حبّ مع الآخرين.

/الحوري يوسف بركات/