مع بداية هالأسبوع المبارك، وبصباح هالنهار، منرفعلك كل التسبيح والمجد والإكرام يا إله السما والأرض.
يا ربّي يسوع، القديس فيلبس الرسول كان معك كل هالسنين وما عرف إنّو كل ما بيشوفك رح بيشوف الله الآب، ونحنا متلو ما عم نعرف كيف نشوفك كل ما عم يرفع الكاهن جسدك ودمك بالقدّاس.
يا ربّي يسوع، بدنا نتقرّب منّك أكتر وأكتر، ونكون عم نعرف نحبّك ونغوص أكتر بسرّ حبّك اللي ما إلو حدود، ونحاول نبادلك هالحبّ، أكتر وأكتر، بمحبّتنا لبعضنا البعض، ونعطيك ذاتنا بكلّيتا ونتخلّى عن أنانيّتنا.
يا ربّي يسوع، نحنا كلنا إيمان فيك وبكلامك اللي بتدعينا فيه إننا نعيش الحقّ وما نتخلّى عنّو ونثبت فيك تا نقدر نكون رسل سلام ومحبّة متل ما كان فيليبس والرسل.
/الخوري يوسف بركات/
