منرفعلك يا ربّ السما والأرض كل التسبيح والمجد بصباح هالنهار المبارك واللي فيه عم بتفيض خيراتك عالدني كلّا.
يا ربّي يسوع، كتار من الناس، ويمكن نحنا منن، منفكّر إنّو القداسة هيي إننا نهرب من العالم، بس إنت قلتلنا إننا لازم نكون بالعالم ولو نحنا مش من هالعالم الأرضي.
يا ربّي يسوع، دايماً بتذكّرنا بكلامك قدّيش نحنا مهمّين بعينيك، وبتدفعنا أكتر وأكتر تا نشتغل بحياتنا على إننا نكون معك.
يا ربّي بسوع، إنت اللي بحياتك عا هالأرض صلّيت تا نكون خميرة نخمّر هالعالم الزايل بالإيمان فيك، وملح تا نعطيه نكهة القداسة، ونور تا نعكس نور الرجا والمحبّة بالقلوب اللي فقدت المحبّة بقلبا.
إحفظنا يا ربّ من الشرّير بهالعالم وجدّدنا تا نقدر نغيّرو من جوا وتتمجّد انت فينا.
/الخوري يوسف بركات/
