بصباح هالنهار الأخير من زمن الصليب، زمن الحياة الأخيرة فيك يا ربّ، منرفعلك يا ربّ أعذب ألحان المجد والتسبيح، ومنشكرك على كل نعمك وعطاياك.

يا ربّ السما والأرض، منوقف قدّام الكرم ومنتأمّل فيك إنت السيّد العظيم، ومنبكي قدّام محبتك.

يا ربّي يسوع، نحنا منعرف قدّيش مسؤوليتنا كبيرة لمّن سلّمتنا كرم الرسالة، وكل واحد وواحدة بحسب موهبتو، وناطر منّا إننا نقدّملك ثمار الخلاص.

من بعد ما نكروك اليهود، سلّمت هالمسؤولية للرسل والتلاميذ ولإلنا من بعدن، بس السؤال هوي إذا عم نحقّق مشيئتك أو لأ.

ساعدنا يا ربّ، تا نداوي جرح قلبك اللي انجرح من خطايانا ونسهر بأمانة على خلاص بعضنا البعض ككنيسة، ونعطي ثمار قداسة بتفرّح قلبك.

/الخوري يوسف بركات/