عظيم إنت يا ربّ، ومبارك إسمك، منرفعلك كل التسبيح والمجد والإكرام بهالصباح المبارك، ومنشكرك على شمسك اللي بتشرقا علينا كل يوم.
يا ربّي يسوع، إنت الخير المطلق، وإلهنا اللي بيدافع عنا بوجّ كل سهام الشيطان وحيلو، وإنت اللي بتسكب فينا كلّ ذاتك يا نبع الحياة.
يا ربّي يسوع، الشيطان عم بيحاول يزرع زؤانو بكل قمحة من أعمالنا وزرعنا بهالحياة، بالمقابل إنت عم تدعي كل زؤانة للتوبة ولتصير حبّة قمح، لأنك ما بتريد إنّو يموت الخاطي، لا بل كرمال إنّو يتوب ويرجعلك تا يقدر يشارك إخوتو بحياة مليانة حب وفرح وسلام.
أعطينا يا ربّ غيرة إيليا النبي عا إيماننا فيك، تا نشيل الزؤان اللي فينا، زؤان الخطية اللي بتحاول إنها تتغلغل فينا، ونرجّعو، بتوبتنا الحقيقيّة، لقمح بيفرّح قلبك.
/الخوري يوسف بركات/
