شو حلو نوعا عالنور اللي بتشرقو علينا يا ربّ الصبح من كل يوم، منحسّ إنّك حاضر معنا، منسبّحك ومنمجّدك ومنشكرك على حضورك الدايم بحياتنا.

أجمل وأصعب حقيقة منواجها يا يسوع إننا نآمن فيك إيمان حقيقي وصادق ومش إيمان مبني عا مصلحة أو مصطنع، وهون يا منحصل عالحياة الأبديّة أو ما رح نشوفا ولا نعيشا.

وأكيد تا نآمن فيك يا ربّ بدنا نآمن بتعاليمك، وويننا نحنا من تطبيق كلامك؟ ومنصير نتحجّج بالضعف البشريّ ونحنا وين وإنت وين، أو منصير نخلق أعذار نبعّد حالنا عنّك يا ربّ، وبالآخر منطلع منآمن.

وتا نآمن فيك وبكلامك يا ربّ، بدّنا نآمن بخينا الإنسان اللي خلقتو تا يكون رسالتنا بالحياة، نعرف نعيش معو المحبّة كشريك بهالحياة اللي عطيتنا ياها، ونفرح لفرحو ونحزن لحزنو، غير هيك ما رح يقدر يشوفك فينا.

/الخوري يوسف بركات/