مع إطلالة هالصباح، غادرنا الليل ومعو تركنا ورانا سنة من حياتنا فيها من المر تا يحلى، وفيها من نعمك ومحبتك خيرات كتيرة ما بتنعد ولا بتحصى يا إله السما والأرض، منسبّحك ومنمجّدك ومنشكرك عا كل لحظة من لحظات حياتنا.
يا ربّ، مرقت هالسنة علينا وكان فيها كتير من الصعوبات الحياتية، بس لمسنا فيها حضورك بكل المواقف الصعبة، ولولاك ما كنا عرفنا كيف نتصرّف.
يا ربّ، مرقت هالسنة علينا وكان أملنا إنّها تكون مزدهرة، بس طلعت متدهورة، ورغم هالتدهور ما تركتنا وكنت عم ترفعنا وتحمينا من التجارب.
يا ربّ، فتّحلنا عيوننا عا سنة جديدة وكلّنا أمل ورجا إننا نعيش فيها متل ما بتريد، نكون رسل سلام مطرح ما في صراعات، دعاة للمحبّة مطرح ما في حقد وبغض وكراهية، مصدر للفرح مطرح ما الحزن معشعش بالقلوب.
إنت فرحنا وسلامنا يا ربّ.
/الخوري يوسف بركات/
