هيدا صباح اليوم التاني من هالسنة الجديدة، وما أجملا الإيّام لمّن بتبلّش بنورك يا إله السما والأرض.
منسبّحك ومنشكرك ومنمجّدك.
يا يسوع الحبيب، قدّيش نحنا بحاجة للسلام، سلام بالعالم وسلام بوطننا وسلام ببيئتنا وبمجتمعنا وبعائلاتنا، وخصوصي بهالظروف القاسية اللي عم نمرق فيا ونعيشا.
يا يسوع الحبيب، قدّيش نحنا مدعوّين تا تشتعل قلوبنا بنار الرجا اللي فينا بإننا نكون دعاة سلام وصلح بين الأخوة بالعيلة أو بين الجيران ببعضن أو بين أهل الضيعة تا نوصل إننا نوصّلك لكل إنسان.
يا ربّي يسوع، نحنا عم نسعى تا حتّى تكون أعمالنا وأقوالنا البذار اللي بتفتح باب السلام للأشخاص اللي عم يفقدو السلام، وشعلة محبّة ليللي غايبة المحبة بحياتن.
/الخوري يوسف بركات/
