منتأمّل اليوم يا ربّي يسوع بكلامك اللي بيحطنا بعالم جديد مبني عالإيمان فيك، وكلنا ثقة إنّو الحياة هيّي معك وحدك يا إلهنا الحبيب، وإنّو الموت هوّي الخطيِّة بحدّ ذاتا، والحياة كلّا فيك.
فيك يا ربّي يسوع تمّت المصالحة بيننا وبين الله الآب، وقدّست الإنسان تا يقدر يعيش معك بهالكون، وفيك سرّ وحياة الإنسان.
اعطينا يا ربّي يسوع القدرة والنعمة تا نفهم معنى الحياة وإنّك إنت اللي بتعطيه الحياة لأنّك إنت الحياة، وما رح نقدر نعيش هالحياة إلّا إذا عرفنا حملناها للخليقة اللي منرفعا لإلك تا تقدّسنا سوا عيلة واحدة.
وتا نحمل هالحياة يا ربّ لازم نعرف نحملك بقلوبنا وبعقولنا يا ربّ الحياة.
/الخوري يوسف بركات/
