منسبّحك يا ربّ اليوم بصباح مليان من نعمك، ومن حبّك وسلامك.
يا ربّي يسوع، قدّيش كانو الرسل محدودين تا فقدو الرجا بقيامتك المجيدة ورجعو لطبيعتن اللي كانو عليها قبل ما يمشو معك ويصيرو إلك تلاميذ!
يا ربّي يسوع، بموتك عالصليب تبدّدت أحلام الرسل وكلّ الوعود اللي وعدو حالن فيا من مناصب وغنى وغيرن، ورجع كل شي لطبيعتو.
ومتل ما دعيتن ببداية رسالتك العلنيّة، اليوم عم تدعيهن وتدعينا من جديد، تا نوعى وننسى ذاتنا ونسعى بحياتنا وبطريقة عيشنا لخلاص العالم.
واليوم يا ربّ رح نجدّد إيماننا فيك، ورح نتبعك ونعيش كلمتك بحياتنا، ونزتّ الشِبَاك وكلنا إيمان إنّو الرسالة وكلامك رح يعطو ثمار القيامة بحياة الآخرين.
/الخوري يوسف بركات/
