وعينا بصباح هاليوم المبارك عا ضوء حبّك بعد ليل متعب وطويل.
بهالأسبوع المبارك، أسبوع الآلام، منلاقي صعوبة مع ذاتنا يا ربّي يسوع، لأنّو طريق الحياة ضيّق وصعب وبيتطلّب الوعي والتجرّد والتخلّي والتواضع ومحاسبة ذاتنا إذا عم نعيش معك وعم نمشي بطريقك بأمانة بحياتنا اليوميّة.
عظيم حبّك يا رب، خلّاك تنزل عن عرش مجدك وتتألّم وتموت وتقوم من بين الأموات، بس السؤال اللي بيطرح ذاتو هوّي إذا عم نبادلك هيدا الحب وعم نتخلّى عن ذاتنا وأنانيّتنا تا نحصل عا حياتك.
ما رح تعني شي إننا نقول أكلنا جسدك وشربنا دمك يا ربّي يسوع إذا ما عشنا حدث الغسل مع الناس اللي بحاجة للمسة حنان منّا.
علّمنا كيف نكون تلاميذ حقيقيّين لإلك، نعرف نقطع هالدني نحنا ومقدمينلك قلوبنا.
/الخوري يوسف بركات/
