بلّشنا أسبوع الآلام بصباح مشرق بنورك يا ربّ، إنت اللي بتغني الدني من كرمك وعطاياك، منسبحك ومنشكرك ومنمجّدك ومنباركك عا حبّك اللامحدود.
يا ربّي يسوع، من بعد ما هتفتلك الناس بالشعانين بالهوشعنا والتهليل، عرفت إنن خدّاعين وبعد وقت قصير رح يصرخو ويطالبو بموتك، لهيك تركتن ورحت تا تبدّد هالحماس الخدّاع.
يا ربّي يسوع، إنت الإله اللي بتشبع الجياع واللي طعميت الآلاف، جعت تا تخلّص الإنسان من عقمو وضعفو، لهيك ناداك صليب الحبّ تا تبذل ذاتك كرمالن.
يا ربّي يسوع، ما في حياة إلّا فيك، إنت اللي بتبدّد الموت وبتكشف العقم، وبتعطي الحياة من فيض حبّك اللي ما بينتهي.
بعّد عنّا يا ربّي يسوع، الأوهام الشرّيرة تا نعيش عا ضوء حبّك الصافي ونختار معك الموت عن العالم.
/الخوري يوسف بركات/
