بأصوات الأطفال الحاملين أغصان النخل والزيتون، ومع الصارخين "هوشعنا للملك" ، منبتدي نهارنا اليوم يا ربّ بفرحة كبيرة بدخولك ملك منتصر بقلوبنا.
يا ربّي يسوع، نحنا جينا اليوم عا هالعيد، بس من ورا أنانيّتنا وتقوقعنا على ذاتنا ما عم نعرف عن شو عم نفتش.
يا ربّي يسوع، نحنا جينا عا هالعيد تا نصرخ هوشعنا، بس، من ورا خوفنا وحقدنا وحسدنا، مش عارفين لمين هالصرخة عم نصرخا.
يا ربّي يسوع، منتوقّف اليوم عندك إنت يا ربّ الهيكل ومش عند الهيكل، وفيك انت اليوم فرحنا ومش بالزيّاحات الفولكلوريّة ولا بالمظاهر الزايلة.
اليوم يا إلهنا الحبيب، رح نصرخلك بقلبنا وبالصوت العالي :
"هوشعنا، تعا يا ربّي يسوع، يا مخلص خلّصنا."
/الخوري يوسف بركات/
