كل التسبيح والمجد منرفعن لإلك يا ربّ السما والأرض، إنت اللي بتشرق علينا بنورك بوسط ظلمة العالم ومغرياتو، منشكرك عا حبّك العظيم لإلنا.
يا ربّي يسوع، قدّيش بيكون الإنسان فارغ من داخلو لمّن بيترك الجوهر وبيغرق بالأمور السطحيّة؟ متل ما غرق الفرّيسيّين والكتبة بالممارسات الشكليّة، وهربو من قدّام ضميرن اللي هوّي صوت الروح القدس اللي بيدعيهن للتوبة.
يا ربّي يسوع، كل همّك كان إنّك توصّل مشيئة الله للناس، والناس همّا كيف توصل للسلطة، همّك الخدمة وهمّن التسلّط، همّك خلاص الإنسان وهمّن أنانيّتن.
خدنا يا ربّي يسوع بإيدينا، ونوّر عقولنا وأفكارنا وقلوبنا تا نعرف نحمل رسالة المحبّة والخلاص للعالم بأمانة، ونملّي حياتنا كلّا منك.
/الخوري يوسف بركات/
