عم تمرق الإيّام والحياة بعدا هيي ذاتا، بس معك يا ربّ الحياة إلها طعم مختلف.

الإيام والأوقات بتحلى معك يا إله السما والأرض.

يا ربّي يسوع، ما حدا فهم ولا رح يفهم ليش اليهود كانو عم يطلبو قتلك إلّا كل اللي عماهن الحسد وقتلن الإضطهاد وأغرتن النميمة.

يا يسوعنا الحبيب، حتّى قرايبينك ما فهمو عمق إلتزامك بالحبّ لأنّن كانو غرقانين بالإشيا السطحيّة والسخيفة، بينما حبّك للإنسان خلّاك تفوت برسالتك للعمق، لقلب الإنسان وتحبّو حبّ ما إلو حدود حتّى الصليب.

اعطينا يا ربّ الوعي والحرّية كأبناء وبنات الملكوت، تا نشهد لحقيقة مشيئتك بحياتنا ونستمد حبّنا وإلتزامنا منّك، ونعيشك بالعالم بوجّ كل الصعوبات اللي فيه.

/الخوري يوسف بركات/