منرفعلك يا ربّ كل التسبيح والمجد والإكرام ، بصباح هالأحد الفارح، اللي فيه عم تشيلنا من عمى الخطيّة ونشوف نورك اللي مضوّي حياتنا.

منتوقّف اليوم يا ربّي يسوع عند سؤالك لأعمى أريحا :

"شو بدك تا أعملّك؟"

وكان جوابو بإنّو يشوف، وأوّل شي شافو بعد ما فتّحتلو عيونو هوّي وجّك الإلهيّ.

بسّ الضياع عنّا نحنا اللي عنّا عيون ومنشوف بالظاهر بس ما عم نعرف نفوت للعمق، والمشكلة الأكبر إذا بتطرح علينا السؤال بدل الأعمى، لأننا ما رح نلاقي جواب حقيقي، كلنا رح نطلب الإشيا المادّيّة والأرضيّة.

اليوم، رح نفوت معك بالعمق يا يسوع، ونجاوبك بطلب واحد أساسي وجوهري: بدنا روحك القدّوس يكون قائد سفينة حياتنا، ونوصل للملكوت ونكون فيه قدّيسين وقدّيسات.

/الخوري يوسف بركات/