ما في أجمل من الصباح اللي بيبتدي بنورك وبكلامك يا إله السما والأرض، إنت اللي بتعطينا الراحة، منشكرك ومنسبّحك ومنمجّدك.
يا ربّي يسوع، نحنا معك دايماً عم نعبر للضفة التانية لمطرح إنت فيه الأساس والغاية والهدف.
معك يا ربّ بدنا نعبر من أنانيّتنا ومن ذاتنا، تا نوصل لضفّة الإيمان فيك تا تشفينا من عاهاتنا وأمراضنا، من خطايانا الظاهرة والخفيّة.
معك يا ربّ بدنا نعبر لعند اللي هنّي متل مجنون الجراسيين، كل اللي سجنتن الخطيّة وشوّهت طباعن وحتّى مظهرن الداخلي والخارجي وأفقدتن الكتير من صفاتن الإنسانيّة، تا تقلنا الكنيسة إنّن هنّي إخوتنا.
معك يا ربّ بدنا نعبر من هالدني الفانية للملكوت تا نشارك بِوَليمتك السماويّة.
/الخوري يوسف بركات/
