بهالصباح المبارك اللي عم نفرح فيه بشفاء المخلّع وعم نعيّد بعيد مار يوسف القدّيس البارّ، منسبّحك ومنمجّدك ومنشكرك يا ربّ لأنّك معنا وباقي معنا للأبد.

يا ربّي يسوع، بكتير من المحطّات بحياتنا منشبه هالملخلّع والأربع أشخاص اللي كانو معو، كلنا مرتبطين ببعضنا وكلنا بحاجة لبعضنا.

نحنا بحاجة لبعضنا يا ربّي يسوع لأنّو الخطيّة بإختلاف أشكالا خلّعتنا روحيًّا ونفسيًّا، صرنا منكمشين عا ذاتنا وساجنين حالنا بالقلق من المستقبل ومن الخوف من الآخر ومن المجهول وحتّى مسجونين بحرّية فهمانينا وعم نعيشا غلط.

بدنا ولازم نتمثّل بهالقدّيس العظيم مار يوسف اللي اتّكل عليك وسلّمك ذاتو وحياتو يا رب، ونتخطّى تخلّعنا بالإحباط والعجز واللامبالاة والفوقيّة، ونرجع نعيش المحبّة والفرح، ونحمل حالنا وكل اللي حويلينا لعندك.

/الخوري يوسف بركات/