إنت النور اللي بينور حياتنا يا ربّ، لهيك كل يوم عن يوم منلاقي صباحنا مليان من نورك يا إلهنا الحبيب.
يا ربّي يسوع، نحنا منعرف إنّو الخطيّة بتعمينا، ومع هيك منضلّ مستعبدين لإلها، ومنعرف إنها بتحجب عنّا النور، ومع هيك منضل عايشين بالظلمة لأننا ضعاف .
من أوّل الخلق يا ربّ، إنت خلقت النور تا تعطي رونق للحياة، واليوم خلقت الأعمى من عيونو وجدّدتو، إنت اللي عطيتو نور النعمة واسكبت من روحك بروحو نسمة حياة إلهيّة ، ولمّن خلقتو رفع عينيه وراح ينما بالنور وشدّدتو تا صار قادر يروح لعند أهلو.
إشفينا يا ربّ من ظلام الخطيّة تا نرفع عيوننا صوب نورك ونترفّع عن هالعالم، ونحملك لأهالينا وعائلاتنا ولكل اللي منلتقي فيهن، بفرح وحبّ مناخدن من نورك اللي بيفيض فينا للأبد.
/الخوري يوسف بركات/
