تصبّحنا والصباح إلك يا ربّ السما والأرض، وتنوّرنا بنورك يا إله الأنوار ، منشكرك عا نعمة الحياة اللي بتعطينا ياها اليوم وكل يوم.
سؤال إيماني منطرحو عا ذاتنا يا ربّ، ليش ما قدرو التلاميذ يشفو الممسوس؟ ليش ما قدرو يشيلو مِنّو الروح النجس؟
والجواب عندك يا يسوع، أكيد لأنّن كانو عم بيركّزو عا طاقاتُن ومش عا عملك فيهن يا ربّ.
يا ربّي يسوع، بالتواضع والموت عن الذات منقدر نمتلي فيك، إنت الللي علّمتنا كيف نواجه الألم والموت، وكيف ناخد من موتك الإيمان تا نقدر نسلّمك قلوبنا وحبّنا وذواتنا ونحملك للعالم تا إنت تشفيون نفساً وجسداً.
يا ربّي يسوع، أغمرنا بحبّك تا تصير إنت الحيّ فينا ونقدّمك لكلّ اللي منلتقي فيون، ونزرع بقلوبن الفرح والسلام، ويتألّق مجدك فينا من الأرض للسما.
/الخوري يوسف بركات/
