حلوة الجلسة الصبح مع ضو الشمس اللي بتشرقا علينا يا ربّ، منشكرك عا كل لحظة إنت موجود فيا معنا.
خطيرة الشريعة يا ربّي يسوع لأنها بتبعّدنا عن الحياة بعمق معك والتعمّق بنعمتك.
يا ربّي يسوع، كان يوم السبت عند اليهود هوّي راحة ويوم الربّ، لأنّو تذكار لإستراحة الله بعد الخلق اللي عملو بست إيام، وبهاليوم صار الخلاص للإنسان وفيه صارت التهيئة لمجيئك يا يسوع.
وبموتك وقيامتك يا ربّي يسوع إكتمل اليوم السابع باليوم التامن، يوم الأحد اللي صار بداية الخلق الجديدة، يوم النعمة والإنتقال من حياة فانية لفيض الحياة الأبديّة وللحبّ الإلهيّ.
أعطينا يا ربّ قلبك تا نتعلّم نحبّ ونميّز الأولويّات بحياتنا ونحبّك بإخوتنا، ونحبّن فيك يا نبع الحياة.
/الخوري يوسف بركات/
