رغم كل الظروف اللي عم نمرق فيها، ووسط كل هالتخبّطات اللي عم بتهزّنا وتهزّ البلدان والعالم، بيبقى إيماننا فيك كبير يا ربّ إنّك حاضر معنا وما بتتركنا، منشكرك ومنسبّحك ومنباركك.
يا ربّي يسوع، أجمل صلاة منصلّيها هيّي إننا نفرّغلك ذاتنا من التمسّك بهالدني الفانية تا نمتلي منّك ومن الله الآب والروح القدس الغافر والمعزّي.
يا ربّي يسوع، نحنا منعرف إنّو الصوم ما بيعني شي وما إلو معنى إذا ما كان مُرافَق بالصلاة، لهيك سعادتنا هيّي إننا نكون عايشين وحاسّين بحضورك بحياتنا، نحكيك ونتواصل معك نحكيك ونشكيلك ونشكرك.
يا ربّي يسوع، بدنا نرجع نبني علاقة الحبّ معك، بدنا نقدّملك قلوبنا تا حتى تنضّفا ويسود منطق الحبّ فيا ونعرف نصغي لإلك ونحبّك ونعمل مشيئك بحياتنا.
/الخوري يوسف بركات/
