صحينا اليوم الصبح على طقس صافي، الشمس شارقة ومدفايي الأرض بأشعّتا، والسما صافيي ومضوّايي الدني بألوانا، منشكرك عا كل شي يا ربّ.
شو حلوة يا يسوع نار الحبّ اللي جيت عا أرضنا وتجسّدت فيا تا تشعلنا من نار حبّك اللي ما إلو حدود، نار حبّك اللي بيفيض علينا نِعَم وفرح وسلام.
يا يسوع، كيف ما بدنا ننبهر بمعموديّة المحبّة والخدمة والتسامح، وإنت اللي غسّلتنا بالروح القدس ولبّستنا ثياب السلام تا نعرف نعيش السلام بين الناس.
إنت يا ربّي يسوع رجانا وأماننا وسلامنا، فيك منقوى على كلّ تجارب الشرير، ومعك منعبر أنهار وبحار الموت والخطيّة اللي عم بتحاول تغرّقنا بأوحالا، وتلبِّسنا الموت.
تعا يا ربّ على قلوبنا، وملّيها من حبّك بكل لحظة تا نعرف نحبّك ونحب خينا.
/الخوري يوسف بركات/
