السما كلّا يا ربّ، بشمسا وبغيوما ونجوما، والأرض بجبالا ووديانا، بمحيطاتا وبحارا وأنهارا، والطبيعة بجمالا، كلّن بيرفعولك التسبيح والمجد.
يا ربّي يسوع، شو ما عملنا، وقد ما قلنا، ما منقدر نعبّرلك عن مدى حبّنا وشكرنا لإلَك لأنَّك جيت وخلّصتنا، ومتت وقمت تا تعطينا الحياة.
يا يسوعنا الغالي، إنت نبع الحياة، ومنّك منستقي الحب والحنان والرحمة والمغفرة، ومن دونك حياتنا فراغ وضياع وموت.
يا إلهنا الحبيب، إنت اللي دعيتنا للقداسة، وبعدك ناطر إستجابتنا، ونحنا ما عم نعرف نحطّك الأوّل بحياتنا، ولا عم نعرف نستجيب متل ما بيحب قلبك، مع إنّو بدنا نكون معك وإلك، اعطينا القوّة إننا نثبت فيك وما نبعد عنّك وما تخلّي الخطية تتغلب عا حياتنا.
/الخوري يوسف بركات/
