صباح الفرح والسلام والطمأنينة هوّي الصباح اللي بيبلّش بأنوارك اللي بتشرق عالمسكونة كلّا يا ربّ وبتغلغل فيا.
يا ربّي يسوع، كيف بيقدر الإنسان إنّو يتبع شريعة ناقصة؟ هيك كان الكتبة والفريسيّين عايشين، وبمجيئك إنت لغيت النقص، وكنت إنت الكمال.
يا ربّي يسوع، هالكتبة والفرّيسيّين توقّفو عالحرف بينما إنت تخطّيت الحرف ودعيتن ودعيت كل إنسان إنّو يروح للأبعد ويفوت بسرّ الله من خلالك.
يا ربّي يسوع، إنت اللي خبّرتنا عن الآب وعن الملكوت اللي بيتطلّب منّا نعيش شريعتك، شريعة المحبّة والتسامح والمغفرة.
علّمنا يا ربّ كيف نشوفك بالآخرين شو ما كانت ظروفن، وقوّينا تا نتغلّب على ضعفنا ونوصل للقداسة.
/الخوري يوسف بركات/
