مع كل نقطة شتي عم تنزل وتسقي الأرض، منشكرك يا ربّ السما والأرض لأنّك عم بتفيض خيراتك علينا.
شو حلوة الطوبى اللي عطيتا وبعدك بتعطيها لكل إنسان بيشتغل على إنّو يكون معك بحياتو.
نيّالو يا ربّ هالإنسان اللي عم بيعيش بحسب كلامك، وهدفو كيف يوصل من خلال خيّو الإنسان للملكوت.
نيالو يا ربّ هالإنسان اللي ما بيشبع من كلمتك وكل هدفو إنّو يمتلي من جسدك ودمك، غذاء لروحو.
نيالو يا ربّ هالإنسان اللي كل حياتو عايش على إنّو يزرع سلامك بكل مكان بيكون فيه.
نيالو يا ربّ هالإنسان اللي عم يعرف يتخطى صعوبات الحياة، من مرض لحزن لضيقة، ويحوّلن للقاء فيك.
وشو حلوة السما المليانة بهالأشخاص اللي عاشو حياة البرارة واستحقّو إنّن يكونو معك بالملكوت، ورح نسعى يا ربّ إنّنا نكون منن.
/الخوري يوسف بركات/
