يا ربّي يسوع، إيماننا فيك بيعطينا الحياة الأبديّة، وهالإيمان بيتجلّى حقيقة لمّن منسمع كلامك ومنتناول جسدك ومنشرب دمك ونفضّلك عا كل شي وكل حدا بحياتنا، ونتخلّى عن الأرضيّات وما نتعلّق فيها.
يا ربّي يسوع، إنت اللي بتملّي قلوبنا فرح وسلام ومحبّة، وبترفع قلوبنا وعيوننا وعقولنا صوبك تا تباركا وتنقّيها وتقدّسا.
معك يا ربّي يسوع كلّ الضمانات الأبديّة بحياة حلوة، ونحنا معك ما منخاف لأنّك دايماً بتسكب فينا سعادة ما بتنوصف لأنها مبنيّة على الإيمان الحقيقي والثابت فيك.
نحنا معك وإلك يا ربّي يسوع، لأننا مآمنين إنّو معك ما منشوف القلق ولا الفساد، ومعك رح تزدهر حياتنا الروحيّة وتثمر ثمار بتليق فيك.
/الخوري يوسف بركات/
