مع كل دقّة قلب بكل إنسان مآمن فيك، وكل همسة روح بتنبض حياة، مننشدلك التسبيح والمجد يا إلهنا الحبيب.

يا ربّي يسوع، صعبة على الإنسان إنّو يتخطّى الخطيّة هوي وبعيد عنّك.

يا ربّي يسوع، بعيد عنّك، صعبة على الإنسان المؤمن إنّو يشارك الخاطي حياتو من دون ما ينغمس معو بالخطيّة.

معك يا ربّي يسوع، الحياة إلها معنى وطعم ولون، ومن دونك ضياع وموت وخطيّة.

معك يا ربّي يسوع، منتأكد من حقيقتنا كأبناء وبنات الملكوت، ومنعرف إنّو رسالتنا هيي إننا نعكس هالبنوّة بحياتنا ونليق بهاللقب اللي عطيتنا ياه.

اليوم، وكل يوم، رح نسعى يا ربّ إننا نعرف قيمة حياتنا ورسالتنا، ونعيشا بملآا، ونكون على قد المسؤولية.

/الخوري يوسف بركات/