يا ربّي يسوع، منشكرك لأنّك بتدعينا تا نرجع متل الأطفال، نعيش الفرح بطفولة روحيّة وين ما منكون.
كيف ما بدنا نكون متل الأطفال الروحيّين، نقبل بحرّيتنا إننا ننتمي لمدرستك يا ربّي يسوع، ونقبل بنور الروح القدس إنّو ينوّر قلوبنا وعقولنا تا نكون من أبناء وبنات الآب السماوي.
كيف ما بدنا نكون متل أطفال روحيّين، نولد ولادة جديدة من الماء والروح بكل لحظة بالتوبة وبعيش الإفخارستيّا والإتِّحاد فيك يا ربّي يسوع وبالمحبّة الأخويّة مع كلّ اللي منلتقي فيون.
يا ربّي يسوع، اعطينا إننا نكون أطفال روحيّين، نحط حالنا بثقة وإيمان بين إيدين الله بيّنا السماوي، اللي أكيد رح يمسكنا ويشيلنا من وحل الخطيّة تا نستحق إننا نورث الملكوت الأبدي.
/الخوري يوسف بركات/
