يا ربّي يسوع، بموت لعازر علّمتنا نفرّق بين الموت الرقاد، لمّن قلت إنّو نايم، فالنوم بيتبعو اليقظة بينما الموت هوي نهاية، ومعك يا ربّ ما في نهاية.
بموتك يا ربّي يسوع قتلت الموت وحوّلتو معبر للحياة الأبديّة المليانة حبّ وفرح وسلام أبديّ، وكلنا رجا إنّو اللي بيموت منّا، وهوي بحالة النعمة، رح يحصل عالحياة الأبديّة معك.
ولعازر عم بيمثّل هالبشريّة الميتة وناطرة تا إنت تحييها.
تعا يا ربّ وانشلنا من موت هالعالم، وساعدنا على إنّنا نعبر معك للحياة الأبديّة، كلّنا إيمان وكلنا رجا فيك يا يسوع، تعا واسكب فينا حياتك، وجدّدنا بروحك، ونجّينا من ذاتنا تا نعرف نعيش معك وإلك بتسبيح دايم.
/الخوري يوسف بركات/
