يا ربّي يسوع، منتأمّل بالرسل كيف لمّن سمعو إنّك حمل الله الحامل خطايا العالم ركضو وراك وتبعوك، وما اكتفيو بإتباعك، لا بل راحو وصارو يخبرو الآخرين ويدعوهن لعندك.

منتأملك يا ربّ كيف بتلتفت صوب الإنسان اللي بيتبعك، وبتنظرلو نظرة محبّة مليانة راحة وفرح وسلام بيخلّوه منجذب أكتر لإلك ومستعد إنّو يتبعك، متل ما إلتفتت صوب الرسل وصارو تلاميذك.

منتعلّم من الرسل يا ربّي يسوع إنّو إذا خبّرنا عنّك ما بيكفي للبشارة، وإنّما الضروري إننا نساعد الآخرين على إنن يلتقو فيك، ونمهّدلن الطريق تا يتحوّلو هنّي بدورن لرسل ومبشّرين.

اعطينا يا ربّ القوّة تا نعرف كيف نعكس نورك بالعالم وندلّ الآخرين عليك بصدق وأمانة على مثال الرسل.

/الخوري يوسف بركات/