شو هالكائن الضعيف والمادّي الإنسان يا ربّي يسوع!
بعدو راكض وراك كرمال الطعام المادّي، وبيحلم بملك زمني بيعطيه كل شي بيطلب.
هيدي حال اللي لحقوك تا يشوفوك ويستفادو منّك متل ما استفادو وقتا كتّرت الخبز وطعميتن، والمهم يكونو عم ياكلو ويشربو من دون تعب وكدّ.
تبعوك يا يسوع من ميلة لميلة تانية من البحيرة لأنن شافو فيك الأعاشة وما شوفو فيك الإله اللي بيعطيهن الحياة، لهيك طلبت منن إنن يشتغلو على ذاتن تا يحصلو على الحياة الأبديّة.
يا يسوع الحبيب، إنت الغِذا الوحيد اللي بيخلّي الموت معبر للحياة، ساعدنا تا نتبعك ونعمل بمشيئتك ونسكب روحك، روح الإستقرار بهالعالم المادّي والتجاري.
/الخوري يوسف بركات/
