يا يسوعنا الغالي، إنت نبع الحياة عا أرض مسيطر عليها الموت، إنت خبز الحياة اللي بياكلو كل إنسان مآمن فيك وبكلامك، تا يعيش ويحيا للأبد.
هيدا الخبز هوي حبّك الإلهي للعالم يا ربّي يسوع، هوي جسدك المقدّس ودمك النقيّ، هوّي كلّ ذاتك، تا تنسكب فينا وتفيض الحياة ويتبدّد الموت ويصير معبر لعندك إنت الحياة الأبديّة.
يا ربّي يسوع، كلامك كلّو روح وحياة واليهود بياخدو كلامك بالحرف وبيفكّرو إنّك عم تدعيهن على أكل لحوم البشر.
اعطينا يا ربّ جسدك تا يتغلغل بكلّ خليّة من خلايانا ويفيض دمّك بعروقنا تا نموت عن ذاتنا وإنت تعيش فينا للأبد. آميـــــــن.
/الخوري يوسف بركات/
