يا ربّي يسوع، شو حلوة التسمية اللي أخدناها بالعماد: "مسيحيّين"، وقدّيش منفتخر إنّو العالم ينسبنا لإلك، إنت المسيح المخلّص اللي مشحتنا بالمعموديِّة تا نكون رُسُلَك بالعالم، نعكس فيه صورتك ومثالك.
بس المشكلة هون يا ربّي يسوع، وهيي كيف عم نعيش هالصورة والمثال؟ لأننا بكتير من الأوقات عم نعيش الخطيِّة اللي بتشوّه صورة الرحمة اللي فينا كأبناء وبنات الملكوت، والأصعب هوّي إننا عم نكون مثال سيِّء عنّك وعن مسيحيِّتنا، لمّن عم نحقد ونكره ونبغض بدل ما نحبّ ونغفر ونسامح.
ساعدنا اليوم يا ربّ، إننا نأكّد لحالنا وللعالم، من خلال أقوالنا وأفعالنا، إننا من سلالة المسيح، سلالة المحبّة والفرح والسلام، ومنفتخر فيا.
