يا ربّي يسوع، إنت جيت عا أرضنا، وتجسّدت وصرت إنسان متلنا تا تعطينا الحريِّة الحقيقيِّة، هالحريِّة ما عرفنا إستثمرناها لا بل إستغلّيناها لأغراضنا الشخصيِّة ولأنانيِّتنا ولطمعنا.

يا ربّي يسوع، هالحريِّة اللي عطيتنا ياها مش شعار، هيِّي حالة داخلية، حالة إرتباط بين الحبيب والمحبوب، وإنت الحريّة الحقيقيّة اللي كان هدفك، وبعدو، إننا نكون معك مبسوطين بهالحياة اللي خلقتنا فيها.

يا ربّي يسوع، العبد اليوم، هوّي الإنسان اللي إستعبدتو الخطيِّة، ونحنا ما بدنا نكون عبيد، بدنا نكون، بقوِّة الروح القدس، أحرار فيك، ونحقِّق الإنتصار عالخطيِّة وعلى كلّ التجارب اللي بتحاول إنها توقّعنا فيها.

/الخوري يوسف بركات/